ḳhala men tair raha hai saval duniya ka
ḳhuda ko aa.ega kis din ḳhayal duniya ka
ye aur baat ki jannat yaqin se aage thi
vahan bhi saath gaya ehtimal duniya ka
hamare nama-e-a.amal men likha us ne
uruj-e-adam-e-ḳhaki zaval duniya ka
ye vaqi.a hai ki insan mar gaya pahle
phir is ke ba.ad hua intiqal duniya ka
koi ḳhabar nahin kis vaqt aur kahan gir jaa.e
ḳhuda ke haath se jam-e-sifal duniya ka
hazar mail ko dhoya hazar sabun se
kisi tarah bhi na chhuTa ḳhayal duniya ka
ajiib rang ka pinjra hai asman niche
tilism-e-ghaib hai ‘ḳhurshid’ haal duniya ka
Leave a Reply