Ghulam Rabbani Taban
laa.i tiri mahfil men mujhe arzu-e-did
darpesh hai phir marhala-e-tur ki tajdid
mayus tamannaon ko ai dost tiri yaad
jaise ufq-e-bim pe ik aḳhtar-e-ummid
ḳhud apna qafas ban ga.i kotahi-e-parvaz
kuchh duur nahin varna jahan-e-mah-o-ḳhurshid
ek ek ada shauq ki tahzib pe maa.il
ek ek nazar shoḳhi-e-jazbat ki tanqid
jo ḳhud na samajh paa.e vo samjha.e to kaise
afkar men ib.ham to guftar men taqid
jiina bhi ibadat use piina bhi ibadat
hasil ho jise chashm-e-siyah-mast ki ta.id
pindar-e-junun ho na saka ram-e-guda.i
raas aa.e na ‘taban’ mujhe altaf-e-sanadid
Leave a Reply