biich jangal men pahunch ke kitni hairani hui
ik sada aa.i achanak jani-pahchani hui
phir vahi chhat par akele ham vahi ThanDi hava
kitne andeshe baḌhe jab raat tufani hui
ho ga.i duur an-ginat viran guzargahon ki koft
ek basti se guzarne men vo asani hui
us ne barish men bhi khiḌki khol ke dekha nahin
bhigne valon ko kal kya kya pareshani hui
gard-e-rah ke baiThte hi dekhta kya huun ‘jamal’
jani-pahchani hui har shakl an-jani hui
Leave a Reply