Arzoo Lakhnavi
tumhen kya kaam nalon se tumhen kya kaam aahon se
chhupaya ho gunah-e-ishq to puchho gavahon se
main kajkol-e-dil-e-be-mudda.a le kar kahan ja.un
ye paigham-e-talab kyuun unchi unchi bargahon se
zaban ho ek ulfat ki to mumkin hai zaban-bandi
hui jo baat chupke ki vo kah Daali nigahon se
mohabbat andar andar ziist ka naqsha palaTti hai
yahi chalti hui sansen badal ja.engi aahon se
sanad be-ai.tmadi ki hai qabl-e-imtihan goya
bayan-e-hal kai pahle halaf lena gavahon se
mohabbat nek-o-bad ko sochne de ghair mumkin hai
baḌhi jab be-ḳhudi phir kaun Darta hai gunahon se
hue jab aap se bahar phir ehsas-e-dui kaisa
pata manzil ka milta hai inhin gum-karda rahon se
bata sakti nahin roidgi-e-sabza-o-gul bhi
faqiron se paTe the ye gaḌhe ya badshahon se
chhalakte zarf ka khulta bharam khota hai baat apni
sukun paata hai dil ka dard nalon se na aahon se
ye pahle soch len a.ankhon men lahrate hue aansu
ki vo phir uTh bhi sakte hain jo gir jaa.en nigahon se
mila baiTha hai sab men kuchh magar munh se nahin kahta
alag samho tum apne ‘arzu’ ko dad-ḳhvahon se
Leave a Reply