Alqama Shibli
dasht-dar-dasht phira karta huun pyasa huun main
aur duniya ye samajhti hai ki dariya huun main
tang sahra nazar aaya hai jo phaila huun main
ho ga.i hai miri tasvir jo simTa huun main
justuju jis ki safinon ko rahi hai sadiyon
dosto mere vo be-nam jazira huun main
kis liye mujh pe hai ye sust-ravi ka ilzam
zindagi dekh le ḳhud tera sarapa huun main
aarzu mere qadam ki thi kabhi rahon ko
aaj lekin dil-e-imkan men khaTakta huun main
paḌh sako gar to khulen tum pe rumuz-e-hasti
vaqt ke haath men ik aisa sahifa huun main
anjuman huun main kabhi zaat se apni ‘shibli’
aur mahfil men bhi rah kar kabhi tanha huun main
Leave a Reply