Jafar Sahni
mohabbaton ki inayaton se hua hai dil ye ḳharab baaba
ḳhuda-parasti ka taur dekho bana hai kaisa azaab baaba
jhulas raha hai zamin ka siina kiran kiran se dua karo tum
travaton ki do buund le kar yahan bhi barse sahab baaba
hai faqa-masti ka silsila jab to aa.e saḳhti qadam men kaise
ye na-tavani ki larzishen hain na pi hai main ne sharab baaba
faza ki jab mo’atabar matanat gurez-pa ho ke rah ga.i hai
kahan likhega vo ḳhamushi se saval paḌh kar javab baaba
hazar taftish par mujhe ab pata chala hai ki mere dil ko
bahut hi bechain kar gaya tha sahar se shab ka hijab baaba
tarah tarah se tabassumon men lapeT kar ḳhvahishon ne luuTa
kise chhupa.un kahan se bolun batao mujh ko vo ḳhvab baaba
muravvaton ki masarraton ki kahaniyan darj ki ga.i thiin
jagah jagah se phaTi paḌi hai na kholo ab vo kitab baaba
sa.ubaton ki afadiyat se koi bhi munkir na ho sakega
ki ḳhaar ke darmiyan rah kar mahak raha hai gulab baaba
vo saTh-basaTh ki siḌhiyon par thakavaton se hai chuur phir bhi
sameT kar hauslon ko ‘ja.afar’ talashta hai shabab baaba
Leave a Reply