hiddat-e-shauq se jalte hain shararon ke hujum
asman se utar aa.e hain sitaron ke hujum
gharq ho jaa.en samundar men kahin socha tha
haa.e qismat hamen milte hain kinaron ke hujum
jaan ko apni chhuḌa laa.en hain viranon men
shahr men jaan ko aate hain saharon ke hujum
kitne pur-kaif hain rangin ḳhizan ke mausam
ji jalate hain baharan men baharon ke hujum
ek manzar ki rahi yaad hamesha ham ko
garche vabasta rahe ham se nazaron ke hujum
dil ki vabastagi ik shaḳhs se mashrut rahi
yuun to milte hi rahe ziist men yaron ke hujum
aaj is shahr-e-ḳhamoshan men chale aa.e hain
zindagi tu ne basa.e hain ye pyaron ke hujum
yunhi chup-chap palaT aa.e hain ḳhamoshi se
ham se dekhe na ga.e dard ke maron ke hujum
dasht men yuun mila karte hain mohabbat se hamen
paanv dharte hain to milte hain ye ḳharon ke hujum
Leave a Reply