Qaisarul Jafri
ye zindagi hai ki aaseb ka safar hai miyan
charagh le ke nikalna baḌa hunar hai miyan
pata chale jo mohabbat ka dard le ke chalo
mire makan ki gali kitni muḳhtasar hai miyan
naha.engi miri zau men hazar-ha sadiyan
main vo charagh nahin huun jo raat bhar hai miyan
tumhari raat pe itna hi tabsira hai bahut
makin andhere men hain chandni men ghar hai miyan
likha hai vaqt ne sadiyon safar ke ba.ad use
ye daur jhuuT sahi phir bhi mo’atabar hai miyan
milegi raakh na tum ko hamare chehre par
badan men rah ke sulagna baḌa hunar hai miyan
ab intizar ki taqat nahin rahi ‘qaisar’
kuchh aur roz na socha to sab khanDar hai miyan
Leave a Reply