Mata-E-Zist Kya Hum Zist Ka Hasil Samajhte Hain

Asghar Gondvi

mata-e-zist kya ham ziist ka hasil samajhte hain

jise sab dard kahte hain use ham dil samajhte hain

isi se dil isi se zindagi-e-dil samajhte hain

magar hasil se baḌh kar sa.i-e-be-hasil samajhte hain

kabhi sunte the ham ye zindagi hai vahm o be-ma.ani

magar ab maut ko bhi ḳhatra-e-batil samajhte hain

bahut samjhe hue hai sheḳh rah-o-rasm-e-manzil ko

yahan manzil ko bhi ham jada-e-manzil samajhte hain

ubharna ho jahan ji chahta hai Duub marne ko

jahan uThti hon maujen ham vahan sahil samajhte hain

koi sargashta-e-rah-e-tariqat is ko kya jaane

yahan uftadgi ko hasil-e-manzil samajhte hain

tamasha hai niyaz o naaz ki baham kashakash ka

main un ka dil samajhta huun vo mera dil samajhte hain

abas hai dava-e-ishq-o-mohabbat ḳham-karon ko

ye gham dete hain jis ko jauhar-e-qabil samajhte hain

gham-e-la-intiha sa.i-e-musalsal shauq-e-be-payan

maqam apna samajhte hain na ham manzil samajhte hain