Arif Abdul Mateen
vo karvan-e-baharan ki be-dara hoga
sukut-e-ghunche ki manzil pe ruk gaya hoga
baja ki dil nahin zindan-e-be-ḳhudi ka asiir
magar ye qaid-e-ana se kahan raha hoga
shua-e-mahr ki nazzargi ke shauq men chand
falak ke dida-e-be-ḳhvab men Dhala hoga
kuchh aisi sahl nahin fan ki munfarid taḳhliq
ḳhuda bhi meri tarah pahron sochta hoga
main tere zehan men rach bas gaya huun misl-e-ḳhayal
jidhar bhi ja.ega tu mera samna hoga
baha ke le bhi gaya meri har mata-e-sukun
jo ashk abhi tire ruḳh par nahin baha hoga
ye aarzu hai ki vo din na dekhna ho nasib
mire amal se mira fikr jab ḳhafa hoga
khila raha hai jo harf-o-nava ke lala-o-gul
vo mera nutq nahin mauja-e-saba hoga
Leave a Reply