tum agar chaho kabhi biphra samundar dekhna
chaudhvin men tum miri ankhon ka manzar dekhna
jo havale se mire mahfil men pahchane ga.e
zikr par mere unhi logon ke tevar dekhna
zaḳhm gin kar kya karoge kar-e-jan-sozi hai ye
jo paḌe honge abhi raste men patthar dekhna
log kahte hain ki tum patthar ho insan to nahin
ab to majburan paḌega tum ko chhu kar dekhna
aaj tak bhi maslahat-koshi hamen aa.i nahin
hai yahi to ek ḳhami apne andar dekhna
us ko ab ham zulm samjhen ya ki gham-ḳhvari tiri
ḳhud rulana aur phir hamdard ban kar dekhna
ye na ho ki na-mukammal hi rahe manzil ka ḳhvab
tez-raftari men lag jaati hai Thokar dekhna
jab khaḌe honge ye sab fir.aun mulzim ki tarah
vo adalat jo lagegi roz-e-mahshar dekhna
Leave a Reply