Sar-E-Niyaz Jhukana Koi Mazaq Nahin

Riyasat Ali Taj

sar-e-niyaz jhukana koi mazaq nahin

ana-e-qalb miTana koi mazaq nahin

labon pe aah ba-har-hal aa hi jaati hai

jigar ki choT chhupana koi mazaq nahin

nuqush-e-qalb miTane se miT nahin sakte

kisi ko dil se bhulana koi mazaq nahin

hansi hansi men bhi kya kya gurez-pa.i hai

tarashte hain bahana koi mazaq nahin

jahan adab men siyasat chali jaati hai

vahan bhi rang jamana koi mazaq nahin

nikalte ho zaminen na.i na.i lekin

radif ka bhi nibhana koi mazaq nahin

jo ahl-e-ilm hain kanTe hain un ki rahon men

ab un ko ‘taj’ haTna koi mazaq nahin