jalta hua jo chhoḌ gaya taaq par mujhe
dekha na is ne luuT ke pichhle pahar mujhe
vahshat se tha navazna itna agar mujhe
sahra diya hai kyuun faqat afaq bhar mujhe
main gunjta tha harf men Dhalne se peshtar
ghera hai ab sukut ne auraq par mujhe
sham-o-sahar ki gardishen bhi dekhni to hain
ab chaak se utaar mire kuza-gar mujhe
darya-e-maug-ḳhez bhi jis par savar tha
hona paḌa savar usi naav par mujhe
mujh men taḌap raha hai koi chashma-e-sukut
zarb-e-asa se dekh kabhi toḌ kar mujhe
pahuncha kidhar yahan na zamin hai na asman
ab kaun si masafaten karni hain sar mujhe
the ganj-e-be-qayas tah-e-qulzum-e-vajud
Duuba jo main to mil ga.e la.al-o-guhar mujhe
jo la sake na taab hi mere junun ki
is dasht-e-kam-savad men daḳhil na kar mujhe
shayad haTa hai ghaib ka parda ‘rafiq-raz’
aata hai naḳhl-e-ab pe sho.ala nazar mujhe
Leave a Reply