akhtar-ansari-akbarabadi

Shairo Hadd-e-Qadamat Se Nikal Kar dekho

shairo hadd-e-qadamat se nikal kar dekho

dastanon ke ab unvan badal kar dekho

kyuun ho taqlid-e-kalim aaj bhi ai dida-varo

didani ho koi jalva to sambhal kar dekho

sham-o-parvana ka andaz naya hai ki nahin

zikr tha jis ka ab us bazm men chal kar dekho

aur bhi ruḳh nazar aenge tajalli ke abhi

ruḳh nigahon ke zara aur badal kar dekho

agle vaqton ke fasane na sunao yaaro

nae mahaul ke sanche men bhi dhal kar dekho

kal ke andaz bhi dilkash the ye taslim magar

aaj bhi shahr-e-nigaran men nikal kar dekho

apne ahbab ki janib na uThao nazren

dekhna hai agar ‘aḳhtar’ to sambhal kar dekho

More Poems

Leave a Comment