sardi-o-garmi-o-barsat men aa jaata hai
mujh se milne vo mazafat men aa jaata hai
fasl-e-gul aane pe ho jaati hai virani duur
dil ḳharabe se ḳharabat men aa jaata hai
kabhi danista ada ho kabhi na-danista
naam tera miri har baat men aa jaata hai
jism ki nashv-o-numa surat-e-ashiya-e-zamin
ru-e-ḳhuban falakiyyat men aa jaata hai
ishq ka sabr-o-tahammul hi se qaa.em hai vaqar
naala fariyad ḳhurafat men aa jaata hai
ḳhidmat-e-ḳhalq se hoti hai ḳhuda ki ḳhidmat
ishq maḳhluq-e-ibadat men aa jaata hai
banda ho jaata hai jab ḳhugar-e-mushkil ‘abid’
za.iqa talḳhi-e-halat men aa jaata hai
Leave a Reply