Kaleem Aajiz
munh faqiron se na phera chahiye
ye to puchha chahiye kya chahiye
chaah ka meyar uncha chahiye
jo na chahen un ko chaha chahiye
kaun chahe hai kisi ko be-gharaz
chahne valon se bhaga chahiye
ham to kuchh chahe hain tum chaho ho kuchh
vaqt kya chahe hai dekha chahiye
chahte hain tere hi daman ki ḳhair
ham hain divane hamen kya chahiye
be-ruḳhi bhi naaz bhi andaz bhi
chahiye lekin na itna chahiye
ham jo kahna chahte hain kya kahen
aap kah liije jo kahna chahiye
baat chahe be-saliqa ho ‘kalim’
baat kahne ka saliqa chahiye
Leave a Reply