Pech Fiqre Par Kiya Jata Nahin

pech fiqre par kiya jaata nahin

koi dhaga do bata jaata nahin

bosa-e-lab ghair ko dete ho tum

munh mira mitha kiya jaata nahin

zoaf ne yak-dast tode pa-e-zist

nabz-e-murda huun hila jaata nahin

zulf se sumbul kare kya ham-sari

pech choti ka kiya jaata nahin

tegh-e-husn-e-yar se majruh hai

tota-e-ḳhat se uda jaata nahin

qabr ka talib abas hai jism-e-zar

chashm-e-dushman men sama jaata nahin

kya kashida surat-e-tasvir huun

na-tavani se khincha jaata nahin

zoaf se pahunchenge kyun-kar aap tak

aap se bahar hua jaata nahin

khinch sake tasvir betabi men kya

ek surat par raha jaata nahin

ruuh ko bhi bosa-e-lab ki hai chaat

mar gae lekin mara jaata nahin

murde se bad-tar huun go jiita huun main

rang-e-hasti men mila jaata nahin

rang kya qadd-ḳhamida ka khile

chhalle ke gul se khila jaata nahin

roz angiya hoti hai arasta

kab naya bangla saja jaata nahin

pech men aane ko taqat chahiye

tere dam par bhi chadha jaata nahin

itr khinchta hai hamari ḳhaak ka

haath malne ka maza jaata nahin

chutkiyan mere sarape men na lo

jama-e-hasti chuna jaata nahin

koi kya ham ko banega ‘munir’

aise bigde hain bana jaata nahin

Leave a Comment