Shayar Jamali
dhajjiyan jaib-o-gareban ki uḌa den ham log
aa.iye fasl-e-baharan ka pata den ham log
jis ke saa.e men ta.assub ki tapish shamil ho
vaqt kahta hai vo divar gira den ham log
dekhen phir kaise miTate hain miTane vaale
ek ik shaḳh nasheman se saja den ham log
aur agar ho na sake kuchh bhi ujalon ki sabil
ik charagh apne lahu se hi jala den ham log
un ki sahba men nasha hai na nigahon men surur
aao mahfil men ye afvah uḌa den ham log
yuun bhi kaT sakte hain ye tishna-labi ke lamhat
baiTh kar bazm men saaqi ko dua den ham log
sang-e-taḳhrib ki vus.at ko karen yuun mahdud
ik mahal shahr men shishe ka bana den ham log
Leave a Reply