khayal-e-tark-e-tamanna na kar sake tu bhi
udasiyon ka mudava na kar sake tu bhi
kabhi vo vaqt bhi aae ki koi lamha-e-aish
mire baghair gavara na kar sake tu bhi
khuda vo din na dikhae tujhe ki meri tarah
miri vafa pe bharosa na kar sake tu bhi
main apna uqda-e-dil tujh ko saunp deta huun
bada maza ho agar va na kar sake tu bhi
tujhe ye gham ki miri zindagi ka kya hoga
mujhe ye zid ki mudava na kar sake tu bhi
na kar khayal-e-talafi ki mera zakhm-e-vafa
vo zakhm hai jise achchha na kar sake tu bhi