apni a.ankhon par vo nindon ki rida oḌhe hue
so raha hai ḳhvab ka ik silsila oḌhe hue
sardiyon ki raat men vo be-makan muflis bashar
kis tarah rahta hai iklauti rida oḌhe hue
ik ajab andaz se aa.i lahad par ik dulhan
chuḌiyan toḌe hue dast-e-hina oḌhe hue
ḳhair muqaddam ke liye baḌhne lagin meri taraf
manzilen apne saron par rasta oḌhe hue
peḌ ke niche zara si chhanv jo us ko mili
so gaya mazdur tan par boriya oḌhe hue
teri yadon ke charaghon ne kiya jhuk kar salam
jab chali andhi koi zor-e-hava oḌhe hue
bhiiḌ men gum ho gaya ik roz ‘sharib’ ka vajud
DhunDhta hai jism par apna pata oḌhe hue
Leave a Reply