Razi Akhtar Shauq
main kahan aur arz-e-hal kahan
vo kahan aur mira ḳhayal kahan
main sitara na tum gulab hue
mil rahe hain magar visal kahan
aag sochun to ḳhaak likhta huun
muttafiq lafz aur ḳhayal kahan
hai vafa ka sila vafa sach hai
lekin aisi koi misal kahan
mujh ko pamal-e-umr karte hue
ja rahe hain ye mah-o-sal kahan
puchhta huun javaz-e-kaun-o-makan
le ga.i jur.at-e-saval kahan
‘asadullah’-ḳhan ki den hai ye
‘shauq’ tum aise ḳhush-ḳhayal kahan
Leave a Reply