Munir Anwar
ghazal kahun ki tujhe hasil-e-ghazal likhun
main lafz likhun magar phir badal badal likhun
tumhare saath jo lamhe nasib men aa.e
unhen main umr kahun aur ek pal likhun
abad qarar duun chahat ki har nishani ko
main tere pyaar ko sarmaya-e-azal likhun
tiri nazar ke badalte hue isharon ko
main tera aaj kahun aur apna kal likhun
likhun to likhta chala ja.un ishq ki zid hai
hai maslahat ka taqaza sambhal sambhal likhun
vo meri ruuh men shamil hai is tarah ‘anvar’
bin us ke ziist faqat saans ka amal likhun
Leave a Reply