tilism-e-koh-e-nida jab bhi TuuT ja.ega
to karvan-e-sada bhi palaT ke aa.ega
khinchi rahengi saron par agar ye talvaren
mata-e-zist ka ehsas baḌhta ja.ega
hava.en le ke uḌengi to barg-e-avara
nishan kitne na.e raston ka pa.ega
main apne qatl pe chiḳha to duur duur talak
sukut-e-dasht men ik irti.ash aa.ega
kivaḌ apne isi Dar se kholte nahin ham
siva hava ke unhen kaun khaTkhaTa.ega
hava.en gard se har raste ko Dhak dengi
hamare ba.ad koi qafila na ja.ega
yunhi Dubota raha kashtiyan agar sailab
to sat.h-e-ab pe chalna bhi aa hi ja.ega
Leave a Reply