Tariq-E-Girya Ab Is Se Behtar Nahin Milega

tarīq-e-girya ab is se behtar nahīñ milegā

ki ek aañsū bhī koī bāhar nahīñ milegā

ye shahr bhedoñ bharā yahāñ aadmī mileñge

magar kisī ke bhī dosh par sar nahīñ milegā

milegā daftar to chhūT jā.egā ghar kahīñ par

jo ghar malegā kahīñ to daftar nahīñ milegā

zamīñ pe pakkī imārateñ ug rahī haiñ aise

divāne sar phoḌne ko patthar nahīñ malegā

chhalaktī āñkhoñ harī-bharī muskurāhaToñ bin

mileñge dīvār-o-dar yahāñ ghar nahīñ milegā

milegī duniyā miloge tum sab mileñge lekin

hamārā vo gum-shuda muqaddar nahīñ milegā

Leave a Comment