Abdul Aziz Khalid
fat.h kitni khub-surat hai magar kitni garan
barha rad ki hai main ne davat-e-vasl-e-butan
naghma-e-bulbul hai faryad-e-vida-e-fasl-e-gul
sai-e-hasil dar-haqiqat hai mata-e-raegan
zinda rahne ke hain imkanat kya asar kya
kaun si qadren hain baaqi kaun si sachchaiyan
shairon ka kaam kya tansiq-e-ausaf-o-lughut
ya sana shahon ki ya mad.h-e-sarapa-e-butan
zahr hai fan ke liye darbar-dari ka mizaj
kam-tarin-e-shart-e-goyai hai ikhlas-e-bayan
tere hathon par laga hai be-gunahon ka lahu
jam-e-jam men mai nahin khun-e-siyadish hai mughan
main to piita huun faqat gulnar honton ki sharab
sabbeh-ism-e-rabbekal-ala rahe vird-e-zaban
khatm hain is shokh raana par tarah-dari ke rang
qadd-e-bala jis ka hai rashk-e-qazib-e-khaizran
jhanjhana uthne ko hain betab tan biina ke taar
kaun laae taab husn-e-be-hijab-e-mah-vashan
be-niyaz-e-harf hai guftar-e-chashm-e-pur-sukhan
darmiyan-e-mahraman-e-jan hai na-mahram zaban
koi tanhai ka gosha koi kunj-e-afiyat
ashiq-o-mashuq yakja hon kahan ai asman
ai muhibbo rah-e-ulfat men har ik shai hai mubah
kis ne khincha hai khat-e-hijran tumhare darmiyan
titliyan dekhi hain baithi khushk phulon par kabhi
hajaten apni karo tum khub-ruon se bayan
ham ne ninden de ke raton se kharide ratjage
ham se kam honge ukaz-e-dahr men bazargan
rat-din sunte hain tasvilat-e-arbab-e-hasad
ehtiyaj-e-dushmanan bhi hai hunar ko be-guman
jaane kin auqat men likhta tha qanun-o-shifa
bu-ali-sina vo maqtul-e-mughan sheva-butan
maut se vahshat hai logon ko mohabbat maal se
bang-e-be-hangam hai kus-e-rahil-e-karvan
hai qarib ai shab zara sub.h-e-qayamat ka tulua
tutne ko hai azal-taban tanab-e-kahkashan
tum akele aae duniya men akele jaoge
zindagi ik pal hai kya pul par banate ho makan
khizr zinda hai magar zindani-e-umr-e-abad
ai ajal kis kaam ki aisi hayat-e-javidan
main bhi huun manind mamun ke amir-ul-kafrin
bas-ki huun varafta-e-fikr-o-fan-e-yunaniyan
hai sulaiman ki taraf vaqif lisan-uttair se
shair-e-zohra-nigahan khalid-e-uqda-zaban
go harim-e-agahi ki shakl bhi dekhi nahin
hai ba-zom-e-khvesh dana-e-rumuz-e-kun-fakan
Leave a Reply