Anjum Usman
ek malbus-e-darida hai miri vahshat-e-hijr
hui jaati hai hijabon men ayaan qamat-e-hijr
ik tahayyur sa tahayyur hai tilism-gah-e-talab
hai fusun-ḳhez kahin us se siva ishrat-e-hijr
daman-e-dard men simTa jo sukut-e-girya
chashm-e-be-ab men poshida rahi ismat-e-hijr
tang-damani-e-alam men sama hi na saki
hai sarir-ara karan-ta-ba-karan vus.at-e-hijr
a.ina-ḳhana-e-dil men hai vahi partav-e-huzn
naqsh-dar-naqsh vahi ḳhal-o-ḳhad-e-shaukat-e-hijr
parda-e-chashm pe raqsan hai tira aks hunuz
so bas ik vahm hai ye kar-gah-e-sa.at-e-hijr
ishq-e-shorida to uryan hua jaata tha magar
parda-dar-e-nigah-e-shauq rahi kisvat-e-hijr
zaḳhm-e-dil dida-e-ḳhunaba-fashan jazb-o-junun
saath laa.i hai ḳhazine ḳhabar-e-tohmat-e-hijr
ik talatum men hai ye alam-e-ab-o-ḳhaki
haa.e mat puchhiye ‘anjum’ zabar-e-hurmat-e-hijr
Leave a Reply