Poet
baḳht ko roya kiye aur ashiyan dekha kiye
bijliyan girti rahin ham be-zaban dekha kiye
iltifat-e-yar shakl-e-dushmanan dekha kiye
raat bhar mahfil men su-e-asman dekha kiye
kar diya sayyad ne qaid-e-qafas to kya hua
ham asiri men bhi ḳhvab-e-gulsitan dekha kiye
patte patte se ḳhizan ne khinch li jan-e-bahar
gulsitan luTta raha aur baghban dekha kiye
ghair us ki bazm men aate rahe jaate rahe
ham baḌi hasrat se ru-e-pasban dekha kiye
rafta-rafta jaan bhi nazr-e-alam karni paḌi
har masarrat jab nasib-e-dushmanan dekha kiye
miTne valon ke liye asbab ki hajat nahin
kya kahen ham kyon kisi ka astan dekha kiye
baḳht ne kab ek halat par hamen rahne diya
umr bhar ham inqilabat-e-jahan dekha kiye
un ki ankhon un ke dil ko afrin sad-afrin
dost ban kar jo miri barbadiyan dekha kiye
vaj.h kuchh ho ham ne jab se aankh kholi hai ‘munir’
roz-o-shab barbadi-e-hindostan dekha kiye
Leave a Reply