tira dil to nahin dil ki lagi huun
tire daman pe aansu ki nami huun
main apne shahr men to ajnabi tha
main apne ghar men bhi ab ajnabi huun
kahan tak mujh ko suljhate rahoge
bahut uljhi hui si zindagi huun
ḳhabar jis ki nahin bahar kisi ko
main tah-ḳhane ki aisi raushni huun
thakan se chuur tanha soch men gum
main pichhli raat ki vo chandni huun
mira ye hashr bhi hona tha ik din
kabhi ik chiḳh tha ab ḳhamushi huun
guzar kar nek-o-bad ki har gali se
sarapa agahi huun gumrahi huun
mira ye huzniya is daur men hai
suḳhan to huun magar na-guftani huun
Leave a Reply