Pagal Ziddi Aur Diwana Kaun Kahe

pāgal ziddī aur dīvāna kaun kahe

tere bin merā afsāna kaun kahe

yuuñ kitne hī mujh ko apnā kahte haiñ

par mujh ko jānā-pahchānā kaun kahe

āñkhoñ āñkhoñ jis kī sūrat rahtī haiñ

us ko lafzoñ meñ batlānā kaun kahe

yaad meñ jis kī āñkheñ jharne ho baiThīñ

us bādal kā ghar aa jaanā kaun kahe

āñkheñ mūñdūñ khul khul jaa.eñ phir sapnā

us ziddī kā haq jatlānā kaun kahe

‘tapish’ tumheñ maqte meñ laanā mushkil hai

bārish meñ jazbe sulgānā kaun kahe

Leave a Comment