agahi aur agahi dijiye agahi kuchh aur
tirgi ghor ghor hai phenkiye raushni kuchh aur
is ka ḳhuda sanam sanam us ka ḳhuda haram haram
ishq ki gumrahi kuchh aur aql ki gumrahi kuchh aur
us ki tahi hai jeb aur is ka dimagh hai tahi
us ki hai muflisi kuchh aur is ki hai muflisi kuchh aur
naaz tira chaman chaman raaz tira dahan dahan
kahti hai tirgi kuchh aur kahti hai raushni kuchh aur
kahti hai dopahar ki dhuup mera mizaj garm hai
lekin ujali raat men kahti hai chandni kuchh aur
bad hai koi na nek hai donon ka maqsad ek hai
garche hai rahzani kuchh aur garche hai rahbari kuchh aur
garche ḳhuda ko aap ne mah-e-laqa bana diya
us ke firaq men ‘jamil’ kijiye sha.eri kuchh aur
Leave a Reply