Jameel Malik
surḳhi-e-sham ne yuun phuul bikhere dil men
jaise chupke se utar aa.e savere dil men
ham to sadiyon se yuun hi gosh bar-avaz rahe
jaane vo kaun hai kya raaz hain tere dil men
paas shab bhar koi ḳhurshid-sifat rahta hai
din to taare se utar aate hain mere dil men
pyaar ki lu se munavvar hai shabistan-e-visal
aaj to aan mile shaam savere dil men
ham musafir hain mohabbat ki kaThin rahon ke
thak bhi jaate hain to karte hain basere dil men
kyuun bhaTakta hai idhar aa ke zara susta le
is taraf dhuup hai badal hai ghanere dil men
apna sarmaya-e-fan phir bhi salamat hi raha
kitni hi baar ‘jamil’ aa.e luTere dil men
Leave a Reply