zindagi ki bahar le ke chale
daman-e-tar-tar le ke chale
gul-ruḳhan-e-chaman ki mahfil se
sina-e-sad-figar le ke chale
aah ye ḳhvab-e-ishq ki ta.abir
alam-e-intizar le ke chale
be-qarari men umr guzri thi
aaj dil ka qarar le ke chale
pa ga.e raz-e-ḳhanda-e-gul ham
dida-e-ashk-bar le ke chale
mil ga.i dad-e-abla-pa.i
pursish-e-nok-e-ḳhar le ke chale
zabt-e-gham ka ‘jamal’ hai ye sila
ta.ana-e-gham-gusar le ke chale
Leave a Reply