tumhari yaad ka marham banam-e-dil kar duun
tamam hijr ke zaḳhmon ko mundamil kar duun
bahut zaruri hai sahra men ishq zinda rahe
so is ko kyon na ata apne ab-o-gil kar duun
abhi to dard mire dil men aarzi hai magar
sifarish aap jo farma.en mustaqil kar duun
jo dagh-e-ishq chamak uThe mere siine men
tamam mah-e-do-hafta ko main ḳhajil kar duun
utar ga.i hain tiri sab udasiyan mujh men
so apni saari ḳhushi tujh ko muntaqil kar duun
haruf-e-shauq men laakh intishar ho ‘ḳhalid’
ḳhayal husn-e-sarapa se main sajil kar duun
Leave a Reply