Amit Sharma Meet
na khuli ankhon se dahshat ka nazara dekhna
jo hamara hai use auron ka hota dekhna
ru-ba-ru us ko nazar bhar dekh bhi sakte nahin
haa.e kitna dukh bhara hai ḳhud ko aisa dekhna
kya ajab sa rog bina.i ko meri lag gaya
har kisi chehre men bas us ka hi chehra dekhna
ishq men pathra chuki ankhon se hai mushkil bahut
chand ko Thahre hue paani men chalta dekhna
haa.e kya manzar-kashi ubhri hai is tasvir men
roti ankhon se kisi pyase ka dariya dekhna
raat bhar bechainiyan sone nahin detin mujhe
aur din bhar raat ke hone ka rasta dekhna
maut ham se do qadam ke fasle par hai khaḌi
ab bahut dilchasp hoga ye tamasha dekhna
Leave a Reply