Aziz Hamid Madni
baiTho ji ka bojh utaren donon vaqt yahin milte hain
duur duur se aane vaale raste kahin kahin milte hain
vahm bhi ho jaata hai dil ko lekin is men ta.ajjub kya hai
aise dasht ki jin men sham.en aap hi aap jalin, milte hain
gahre surḳh gulab ka andha bulbul saanp ko kya dekhega
paas hi ugti nag-phani thi saare phuul vahin milte hain
kaan men moti haath men kangan phuul chameli ka juuḌe men
kya kya rang jamane vaale ankhen jin se basin, milte hain
tere jism ki dhaar kaTar si aankh ke pardon men taḌpi thi
ḳhakistar ankhon men kya kya un lamhon ke nagin milte hain
tum ko jhuTa Thahra sakta kis men itna jas hai lekin
aise log bahut hote hain va.ada kar ke nahin milte hain
kohna sara.e ki raushniyon ne kah hi diya divaT ke diyon se
aao aao Thahro Thahro mehman roz nahin milte hain
sar ka sauda paanv ki gardish jo bhi sabab ho na milne ka
tum to sahab kya milte ho milte hain to hamin milte hain
Leave a Reply