manzil pe pahunchne ka mujhe shauq hua tez
rasta mila dushvar to main aur chala tez
hathon ko Dubo aa.e ho tum kis ke lahu men
pahle to kabhi itna na tha rang-e-hina tez
mujh ko ye nadamat hai ki main saḳht-gulu tha
tujh se ye shikayat hai ki ḳhanjar na kiya tez
chal main tujhe raftar ka andaz sikha duun
ham-rah mire sust-qadam mujh se juda tez
afsurdagi-e-gul pe bharin kis ne ye aa.hen
chalti hai sar-e-sahn-e-chaman aaj hava tez
ab mujh ko nazar pher ke ik jaam de saaqi
phir kaun sambhalega agar nashsha hua tez
insan ke har gham pe ‘saba’ choT lagi hai
shishe ke chaTaḳhne ki bhi thi kitni sada tez
Leave a Reply