kya puchhte ho hal-e-dil-e-be-qarar aaj
jo kal thi hai vo gardish-e-lail-o-nahar aaj
us paikar-e-jafa ko na kos ai dil-e-hazin
teri tarah hai vo bhi bahut be-qarar aaj
mere hi dam se rah gaya mai-ḳhane men bharam
varna janab-e-shaiḳh ko milta udhar aaj
us ne likha hai bahr-ayadat kal a.enge
jiine bhi dega mujh ko dil-e-be-qarar aaj
kis mast ki dua hui maqbul-e-bargah
aaya hai jhuum jhuum ke abr-e-bahar aaj
mere liye kahin bhi jahan men sukun nahin
le kar kahan chala hai dil-e-be-qarar aaj
us gul ne jaane kya mire baare men kah diya
guzri hai mujh se kaT ke nasim-e-bahar aaj
ye faiz hai ‘tabib’-o-‘qatil’ aur ‘zar’ ka
‘asi’ jo sha.iron men hai tera shumar aaj
Leave a Reply