Kya Puchhte Ho Haal-E-Dil-E-Be-Qarar Aaj

kyā pūchhte ho hāl-e-dil-e-be-qarār aaj

jo kal thī hai vo gardish-e-lail-o-nahār aaj

us paikar-e-jafā ko na kos ai dil-e-hazīñ

terī tarah hai vo bhī bahut be-qarār aaj

mere hī dam se rah gayā mai-ḳhāne meñ bharam

varna janāb-e-shaiḳh ko miltā udhār aaj

us ne likhā hai bahr-ayādat kal ā.eñge

jiine bhī degā mujh ko dil-e-be-qarār aaj

kis mast kī duā huī maqbūl-e-bārgāh

aayā hai jhuum jhuum ke abr-e-bahār aaj

mere liye kahīñ bhī jahāñ meñ sukūñ nahīñ

le kar kahāñ chalā hai dil-e-be-qarār aaj

us gul ne jaane kyā mire baare meñ kah diyā

guzrī hai mujh se kaT ke nasīm-e-bahār aaj

ye faiz hai ‘tabīb’-o-‘qatīl’ aur ‘zār’ kā

‘āsī’ jo shā.iroñ meñ hai terā shumār aaj

Leave a Comment