Poet
subh-e-visal-e-zist ka naqsha badal gaya
murgh-e-sahar ke bolte hi dam nikal gaya
daman pe lotne lage gir gir ke tifl-e-ashk
roe firaq men to dil apna bahal gaya
dushman bhi gar mare to khushi ka nahin mahal
koi jahan se aaj gaya koi kal gaya
surat rahi na shakl na ghamza na vo ada
kya dekhen ab tujhe ki vo naqsha badal gaya
qasid ko us ne qatl kiya purze kar ke khat
munh se jo us ke naam hamara nikal gaya
mil jaao gar to phir vahi baham hon sohbaten
kuchh tum badal gae ho na kuchh main badal gaya
mujh diljale ki nabz jo dekhi tabib ne
kahne laga ki aah mira haath jal gaya
jiita raha uthane ko sadme firaq ke
dam vasl men tira na ‘amanat’ nikal gaya
Leave a Reply