sach hai gham-e-firaq men ham ro nahin sake
vo bhi tamam raat magar so nahin sake
be-fa.eda hai chahna asnam se vafa
ye sang-dil kisi ke kabhi ho nahin sake
patthar ke log hain jahan shishe ke bam-o-dar
ham us zamin men dard-e-vafa bo nahin sake
siine men ek daagh laga aur umr-bhar
dhote rahe vo daagh magar dho nahin sake
adab-e-parda-dari-e-zabt-e-fughan na puchh
tufan dil men uThte rahe ro nahin sake
ranginiyon ke ahd men ḳhushiyon ke daur men
chaha ghamon ko khona magar kho nahin sake
tasḳhir-e-mahtab mukammal to ho ga.i
daman men us ke ek bhi pal so nahin sake
ayyari-e-siyasat-e-ahbab dekhiye
chaha kisi ke ho ke rahen ho nahin sake
Leave a Reply