Ayub Khawar
saat suron ka bahta dariya tere naam
har sur men hai rang-dhanak ka tere naam
jangal jangal uḌne vaale sab mausam
aur hua hai sabz dupaTTa tere naam
hijr ki shaam akeli raat ke ḳhali dar
sub.h-e-firaq ka zard ujala tere naam
tere bina jo umr bata.i biit ga.i
ab is umr ka baaqi hissa tere naam
in sha.ir a.ankhon ne jitne rang chune
un ka aks aur mera chehra tere naam
dukh ke gahre niile samundar men ‘ḳhavar’
us ki ankhen ek jazira tere naam
Leave a Reply