Sarmad Sahbai
raushni rangon men simTa hua dhoka hi na ho
main jise jism samajhta huun vo saaya hi na ho
a.ina TuuT gaya chunta huun reza reza
isi a.ine men mera kahin chehra hi na ho
main to divar ke is paar ravan huun kab se
koi divar ke us paar bhi chalta hi na ho
vo jo sunta hai miri baat baḌe ghaur ke saath
baad jaane ke mire mujh pe vo hansta hi na ho
jagti ankhon men kyuun phailta jaata hai ḳhala
kha ga.i hai jise duuri tira rasta hi na ho
moḌ har raah pe paanv se lipaT jaate hain
vo mujhe chhoḌ ke chal de kahin aisa hi na ho
us ke milne pe bhi mahsus hua hai ‘sarmad’
us ne dekha hi na ho main ne bulaya hi na ho
Leave a Reply