Sufi Tabassum
vo mujh se hue ham-kalam allah allah
kahan main kahan ye maqam allah allah
ye ru-e-daraḳhshan ye zulfon ke saa.e
ye hangama-e-sub.h-o-sham allah allah
ye jalvon ki tabaniyon ka tasalsul
ye zauq-e-nazar ka davam allah allah
vo sahma hua ansuon ka talatum
vo ab-e-ravan be-ḳhiram allah allah
shab-e-vasl ki sa.aten muḳhtasar si
tamannaon ka izhdiham allah allah
vo zabt-e-suḳhan men labon ki ḳhamoshi
nazar ka vo lutf-e-kalam allah allah
Leave a Reply