Koi Hamdard Nahin Koi Bhi Dam-Saz Nahin

Kashfi Lucknavi

koi hamdard nahin koi bhi dam-saz nahin

ab to is bazm men meri koi avaz nahin

naghma kaisa ki labon par bhi hai ik mohar-e-sukut

dil ki dhaḌkan ke siva ab koi avaz nahin

aur hi hoti hai ik saz-e-shikasta ki sada

soz-e-gham jis men na ho dil ki vo avaz nahin

mahv-e-parvaz hai us auj pe bhi mera ḳhayal

jis bulandi pe farishton ki tag-o-taz nahin

ḳhaar ban jaana hai har phuul mire hisse ka

baghban ye miri qismat ka to e.ajaz nahin

jab se badla hai tira tarz-e-sitam ai zalim

dil-e-bismil ke taḌapne ka vo andaz nahin

karvaTen lete hain naghmat-e-mohabbat is men

dil ki avaz se behtar koi avaz nahin

phir ga.i milne se pahle vo nazar ai ‘kashfi’

ye vo anjam hai jis ka koi aghaz nahin