falak se chand sitaron se jaam lena hai
mujhe sahar se nai ek shaam lena hai
kise khabar ki farishte ghazal samajhte hain
khuda ke samne kafir ka naam lena hai
muamla hai tira badtarin dushman se
mire aziiz mohabbat se kaam lena hai
mahakti zulfon se khushbu chamakti aankh se dhuup
shabon se jam-e-sahar ka salam lena hai
tumhari chaal ki ahistagi ke lahje men
sukhan se dil ko masalne ka kaam lena hai
nahin main ‘mir’ ke dar par kabhi nahin jaata
mujhe khuda se ghazal ka kalam lena hai
bade saliqe se noton men us ko tulva kar
amir-e-shahr se ab intiqam lena hai
Leave a Reply