Jo Jo Shuur-e-Zehn Pe Aata Chala Gaya

jo jo shu.ur-e-zehn pe aata chala gaya

dil kulfaton ke daagh miTata chala gaya

la kar bahar-e-nau ke gul-e-nudrat-e-ḳhayal

sahra ko main chaman sa banata chala gaya

allah ka ye fazl hai mujh pe ki bahr-e-ilm

kuuze se mere dil men samata chala gaya

alfaz ke guhar se ghazal ki zamin ko main

jaise falak-nazhad banta chala gaya

tar-e-nafas pe chheḌ ke ik naghma-e-hayat

main agahi ke saaz pe gaata chala gaya

ulfat ki raah kar ke zamane pe ashkar

‘ahsan’ main ḳhar-e-rah haTata chala gaya

Leave a Comment