Tafsil Masafat Ki

ik din jo baham honge

tujh se tire darmanda

kya arz guzarenge

kya haal sunaenge

mauhum kashida hai

tasvir qayamat ki

shayad na suna paaen

tafsil masafat ki

lab basta rahen shayad

ye din jo guzare hain

mahram hai koi kis ka

ya zakhm ki sargoshi

ya hamare hain

ankhon pe kiye saaya

kab duur talak dekha

larzan thi zamin kis pal

kab su-e-falak dekha

kab dasht ki tanhai

ankhon men utar aai

kab vahm samaat thi

kab kho gai goyai

kis mod pe hairan the

kis raah men viran the

ijmal haqiqat ke

shayad na raqam honge

ik din jo baham honge

tak lenge tiri surat

aur sar ko jhuka lenge

mal Dalenge ankhon ko

gar yaad sarab aae

gum-sum tiri chaukhat par

ho jaenge ham shayad

chhu kar tire daman ko

so jaenge ham shayad

Leave a Comment