lutf hi lutf hai jo kuchh hai inayat ke siva
hai mohabbat se siva jo hai mohabbat ke siva
doston ke karam-e-ḳhas se bachne ke liye
koi gosha na mila gosha-e-uzlat ke siva
mujh se shikva bhi jo karte hain to ye kahte hain
kuchh bhi aata hi nahin tujh ko shikayat ke siva
aap ke ḳhat ko main kis baat ka ghammaz kahun
is men sab kuchh hai bas ik harf-e-mohabbat ke siva
jis qadar chaho gunahon pe hanso ḳhuub hanso
ye ilaaj aur bhi hai ashk-e-nidamat ke siva
vo jo kahte hain ki hai fahm o firasat ham se
aise logon men sabhi kuchh hai firasat ke siva
is na.i baat ko bhi ‘arsh’ kabhi socha hai
aaj kal sher men jiddat hai to jiddat ke siva
Leave a Reply