Asrarul Haq Majaz
sazgar hai hamdam in dinon jahan apna
ishq shadman apna shauq kamran apna
aah be-asar kis ki naala na-rasa kis ka
kaam bar-ha aaya jazba-e-nihan apna
kab kiya tha is dil par husn ne karam itna
mehrban aur is darja kab tha asman apna
uljhanon se ghabrae mai-kade men dar aae
kis qadar tan-asan hai zauq-e-raegan apna
kuchh na puchh ai hamdam in dinon mira aalam
mutrib-e-hasin apna saqi-e-javan apna
ishq aur rusvai kaun si nai shai hai
ishq to azal se tha rusva-e-jahan apna
tum ‘majaz’ divane maslahat se begane
varna ham bana lete tum ko raz-dan apna
Leave a Reply