dasht-e-dua men tere parastar rah ga.e
sho.alon ke abshar men gulnar rah ga.e
tere visal-o-hijr ga.e to gaya magar
teri shabahaton ke sab azar rah ga.e
jin par tire gulab se chehre ke aks hain
meri nazar men vo dar-o-divar rah ga.e
vo to amir-e-shahr ki aghosh men gaya
us ki gali men a.ina-bardar rah ga.e
ham ne likhe huruf-e-gham-e-jan varaq varaq
paḌhne ko gesu-o-lab-o-ruḳhsar rah ga.e
zaḳhm-e-hunar ke chahne vaale nahin rahe
ḳhush-rang shohraton ke ḳharidar rah ga.e
jalne lage badan to barasne laga lahu
suraj ki raah men rasan-o-dar rah ga.e
Leave a Reply