Anwar Masood
sochna ruuh men kanTe se bichha.e rakhna
ye bhi kya saans ki talvar bana.e rakhna
ab to ye rasm hai ḳhushbu ke qaside paḌhna
phuul gul-dan men kaghaz ke saja.e rakhna
tirgi TuuT paḌe bhi to bura mat kahiyo
ho sake gar to charaghon ko jala.e rakhna
raah men bhiiḌ bhi paḌti hai abhi se sun lo
haath se haath mila hai to mila.e rakhna
kitna asan hai ta.id ki ḳhu kar lena
kitna dushvar hai apni koi raa.e rakhna
koi taḳhliq bhi takmil na paa.e miri
nazm likh luun to mujhe naam na aa.e rakhna
apni parchha.in se munh moḌ na lena ‘anvar’
tum use aaj bhi baton men laga.e rakhna
Leave a Reply