Sochna Ruh Mein kanTe Se Bichhae Rakhna

sochnā ruuh meñ kāñTe se bichhā.e rakhnā

ye bhī kyā saañs kī talvār banā.e rakhnā

ab to ye rasm hai ḳhushbū ke qasīde paḌhnā

phuul gul-dān meñ kāġhaz ke sajā.e rakhnā

tīrgī TuuT paḌe bhī to burā mat kahiyo

ho sake gar to charāġhoñ ko jalā.e rakhnā

raah meñ bhiiḌ bhī paḌtī hai abhī se sun lo

haath se haath milā hai to milā.e rakhnā

kitnā āsān hai tā.īd kī ḳhū kar lenā

kitnā dushvār hai apnī koī raa.e rakhnā

koī taḳhlīq bhī takmīl na paa.e mirī

nazm likh luuñ to mujhe naam na aa.e rakhnā

apnī parchhā.īñ se muñh moḌ na lenā ‘anvar’

tum use aaj bhī bātoñ meñ lagā.e rakhnā

Leave a Comment